Re: [14/07/30古聞] 古仔首見小演員大展父愛
蘋果日報
升呢做校長】千嬅自言似校長
古仔遭小演員「恰」
楊千嬅、古天樂、劉玉翠、姜皓文、吳耀漢、吳浣儀、馮淬帆、監製陳木勝、導演關信輝等,連同五位小演員,今日喺荃灣出席電影《五個小孩的校長》嘅 「學校開放日」,現場仲有切燒豬拜神儀式。
之後五位小演員仲即席獻唱《小太陽》,之後古仔送佢哋一人一個雪糕甜筒獎勵佢哋,而千嬅就好似做返戲中嘅校長角色咁,提班小朋友多謝哥哥喎!
今日有周刊報道指,千嬅一角原本屬意由「許師奶」鄭秀文(Sammi)演出,而當日電影招募小演員拍攝通告上,亦曾寫明女主角係Sammi,惟據該報道所指,直到電影開拍前一個月,Sammi擔心同古仔嘅陳年緋聞再遭翻炒,為免令「老公」許志安呷醋,所以Sammi決定辭演云云。古仔回應時就話唔係,而千嬅亦表示:「開拍前四個月就搵我。」
另外,千嬅表示喺呢間學校拍咗8日戲,佢大讚電影嘅美術指導:「佢哋將呢度重新裝修再整返舊佢,我都問佢拎咗電話,第時嗰仔有美術功課可以問佢。」古仔聽到就喺隔離笑千嬅即係出貓喎﹗
千嬅又話拍完電影後,覺得自己可以辦教育:「我就算cut咗機都似校長,會做衰人,佢哋(指小演員)唔記得對白就企樓梯一分鐘,不過佢哋好乖,聰明又聽話。」
戲入面做千嬅老公嘅古仔就話,自己喺戲中照顧千嬅,千嬅就負責照顧小朋友:「今日第一次見啲小演員,佢哋恰我,見親我都嘻嘻哈哈,唔怕我。」
問到古仔想唔想生小朋友,佢就話係兩件事嚟喎,佢又笑言自己成日實習,因為親戚朋友都好多小朋友。千嬅就話今次拍戲,好似一次生咗五個咁,就算cut機都會同佢哋相處,似一家人咁投入,佢又話:「副導都辛苦,要一個副導跟一個小演員。」古仔都話:「呢隊都係《掃毒》團隊,不過今次仲多人。」
千嬅就話自己都有幫手照顧,仲俾小演員笑自己NG添﹗問到千嬅一次湊五個小朋友驚唔驚?佢就話:「唔怕,不過覺得母愛真係好偉大。」
自己有冇意再追多個先?千嬅表示諗一諗先:「我都有教個仔唱《小太陽》,但佢冇理我,遲啲可能帶囝囝嚟同啲姐姐玩下,但佢見我照顧其他小朋友,可能會呷醋。」