都市日報
娛樂CIB 獨家 直擊《迷城》中環槍戰 「爆缸」古天樂追殺張孝全
林嶺東繼《鐵三角》後闊別大銀幕7年，新戲《迷城》邀得港、台三大型男古天樂、余文樂同張孝全演出，佢仲講到明大部分喺香港取景，娛樂CIB當然收到風飛去探班啦！前晚佢哋喺中環取景，三個型男齊腳拍Ending戲，又打交又開槍，超正！
《迷城》前晚喺中環皇后像廣場拍攝，額頭化咗受傷妝嘅古天樂，細心聽導演講解，之後見佢又同余文樂排戲，樂仔仲同古仔研究點樣揸槍，兩個都好認真。原來呢場Ending好刺激，古仔揸住支槍衝去張孝全度，樂仔跟住跑過去想制止，現場氣氛勁緊張。CIB八到，《迷城》入面古仔同樂仔係好兄弟，兩人因招惹到飾演台灣黑幫嘅張孝全而面臨危險。呢晚三位型男拍對手戲，其中飾演警察嘅姜皓文同伍允龍都有在場，當晚仲拉起藍布景，方便後期特技製作。其實上兩個星期，娛樂CIB先撞到余文樂同戲中女主角佟麗婭在尖沙咀嘉蘭圍拍《迷城》，當日樂仔不時練習被打，又擺出Chok樣企喺架拖車側邊，揸慣靚車的他，今勻揸拖車，一樣難唔到佢。
其實近年港產片鹹魚番生，多得有內地市場，就連七年無開戲的林嶺東都出山，而演員嘅片酬更加水漲船高，昨日有報道指古天樂加了片酬，由1,000萬人民幣加至至少1,500，加幅達5成，單是頭半年，佢就接咗《迷城》、《殺破狼II》、《五個小孩的校長》和《衝上雲霄》四部戲，片酬已穩袋6,000萬人仔，認真和味。
佟麗婭年薪約三千萬
今年三十歲的內地女星佟麗婭，首次來港拍戲便當上《迷》片的女主角，對香港觀眾來說較陌生，不過這位畢業於中央戲劇學院表演系的新疆姑娘，拍過不少內地電視劇，包括《母儀天下》和爾冬陞執導的《新不了情》，其後又參演電影《唐山大地震》，今年五月福布斯公布「2014年中國名人榜」，她排行43位收入達成2,580萬人民幣，不遜於排33位收入達3,900萬的古天樂。
▲劇情講古仔拿槍指住張孝全，樂仔上前阻止。
▲手執道具槍的古仔，戲中受傷。
▲「雙樂」在戲中飾演好兄弟，兩人正在藍布景前排戲。